Fjölskyldan Víkurtúni 2

Annáll 2009.  Þar sem árið er nú að renna í aldanna skaut er vert að líta yfir farinn veg.

Janúar-maí: Sverrir smíðaði fjölplóg á hjólið í desember og mokaði gangstéttir sem óður væri, eldri borgurum og barnavagnaökumönnum til mikillar ánægju.  Strákarnir með tennurnar á plastdráttavélunum veittu honum mikla samkeppni.  Salbjörg lenti í samstuði í fótbolta á íþróttadegi barnanna í skólanum svo stórsá á fótleggnum, en hann blés út sem bolti og varð helblár.  Þar sást það enn og aftur að ég á ekki að taka þátt í þessu.  Ég bíð aftur á móti eftir handavinnudegi skólans eða eitthvað álíka..  Börnin sóttu skíðaæfingar eins og áður og kepptu á nokkrum mótum, í apríl var farið á Andrésar leikana að venju.  Þar sem fermingarveisla Jakobs Inga átti að vera heima, enda við með ekta veisluhús, var ákveðið að reyna að flikka upp á bæinn.  Við settum parket í stað grábrúnblettótta stofuteppisins, áður hvíta.  Frúin réði gamlan séns til að mála ganga og sali og Arnar Andrapabbi kom með fríðu föruneyti þ.e. konu sína Unni Malín og soninn Andra og lauk verkinu á nokkrum klukkutímum, meðan skruppum við til Reykjavíkur  að útrétta fyrir ferminguna.  Við þökkum Arnari enn og aftur fyrir þetta.  Börn fæddust eitt af öðru á árinu hjá "litlu" systrum Sverris. Guðbrandur Snær Öllu og Vallason, öðru nafni Glæsir,fæddist 9. febrúar og Alla flutti hingað norður um það leiti. Hún er nánast fullnuma snyrtifræðingur og nú erum við öll spikk og span hér á Ströndum, förum reglulega í sjæn á Puntstofuna.  Jóhanna og Steini eignuðust Þorstein Dag Newton 29. mars og ætla síðan að bæta öðru kríli við í febrúar 2010.  Nóg að gera á þeim bænum.  Ragna og Björn eignuðust einn sameiginlegan stráksa í lok apríl en þau eiga 5 börn fyrir.  Þau eru á Akureyri, þannig að lítið er um að við skiptum okkur af þeirra uppeldi.

Maí-ágúst: Sauðburður var að venju í maí og Sverrir fór í smá "fæðingar"orlof af þeim sökum, mátti ekki vera minni en systur sínar.  Síðan rann fermingardagurinn upp 31. maí.  Við fengum fullt af góðum gestum sem rúmuðust bara vel í húsinu og ekkert sást á nýja parketinu.  Við höfðum klárað sólpallinn fyrr um vorið sem við byrjuðum á í fyrra en vegna mikillar ferðar á Hólmavíkurlogninu þann daginn, var lítið hægt að vera úti. 

Við heimsóttum Akureyri í júní í tilefni skírnar Elmars Nökkva Björnssonar og síðan tók undirbúningur fyrir Hamingjudagana við í lok júní.  Ragna var hjá okkur með börnin í lok júní og Ingvar, Hulda og þeirra afkomendur heimsóttu okkur Hamingjudagahelgina, en þau höfðu verið á Lyngholti í pallasmíði.  Nokkrir svangir vinir Andra fengu fæði og húsaskjól að venju.  Furðuleikarnir voru haldnir og Ingvar keppti í staurakasti, krakkarnir í öskurkeppninni og við Sverrir í kvennahlaupinu að venju. Við erum löngu hætt að sigra það hlaup, kallinn verður nú ekkert yngri og ekki léttist kellan nú.  Sverrir var allt sumarið í vegavinnu í Bitrunni og því var lítið um sumarfrí hjá honum , enda sleppir maður ekki svona vinnu ef hún býðst.  Ég tók mitt sumarfrí á þann hátt að ég vann fyrir hádegi og var í fríi eftir hádegi, en ég tók þó 3 vikur í beit líka.  Þetta kom einfaldlega betur út þar sem Júlíana var hætt á leikskóla og Kristín passaði hana þá fyrri part dagsins.  Jakob var í unglingavinnunni og stóð sig vel þar og Andri var hreppari og flokkstjóri vinnuskólans þetta sumarið.  Stefnt var að því hjá Strandabyggð að veita heimamönnum vinnu og Andri naut góðs af því eins og fleiir, enda erfiðara að fá vinnu fyrir sunnan. Hann skrapp þó viku til Danmerkur um miðjan júlí enda kominn með augastað á háleggjuðum farfugli þar, Ane Storch Jakobssen.  Sverrir fékk sér smá sumarfrí eftir verslunarmannahelgina og við fórum á landsmót á Króknum þar sem krakkarnir kepptu í fótbolta (Jakob) og langstökki (Kristín).  Alltaf gaman að fara á landsmót.  Við vorum síðan á Akureyri í íbúðinni hennar Láru (enn og aftur bestu þakkir Lára) fram að Fiskideginum mikla og versluðum skóladót og fl.  Eftir viðkomu á Dalvík á laugardeginum héldum við heim.  Ég  kvaddi elskulega ömmusystur og fyrrum nágranna Mummu í Bæjum er hún var borin til grafar um miðjan ágúst og síðar sama dag glöddumst við í brúðkaupi  Adda og Hildar og áttum með þeim góða kvöldstund.  Stefnumót á Ströndum var atvinnuvegasýning sem var haldinn í lok ágúst, þar ætluðum við að sýna landanum og já umheiminum öllum hvers við erum megnug.  Hlaðin var varða til framtíðar við félagsheimilið og hleðslumenn voru valdir Sverrir Guðbrandsson f. 1921, Guðbrandur Sverrisson f. 1946, Sverrir Guðbrandsson  f. 1969 og Jakob Ingi Sverrisson f. 1995. Fjórir ættliðir hjálpuðust að þennan dag við hleðsluna og má líta vörðuna augum við félagsheimilið. Gestir voru beðnir um að koma með steina með sér og komu steinar frá Bessastöðum m.a. og víðar. 

Sept-des:
Júlíana Steinunn byrjaði í skóla í lok ágúst, hún var þó ekki alveg tilbúin lærdóminn fyrst, en þetta er allt að koma.  Hún er farin að geta lesið aðeins og getur lagt saman og dregið frá.  Salbjörg skellti sér á skrifstofubraut II í M.K, svona mest til að sanna það fyrir sjálfri sér að hún gæti þetta og eins til að reyna að sannfæra sig um að henni hlyti að finnast þetta skemmtiegt eins og "öllum" öðrum.  Ég svo sem hélt áfram í öllu öðru félagsstarfi með skólanum, þannig að það var nóg að gera allt haustið en þessu lauk og ég fékk ágætis einkunnir, en ég sé það alveg að þetta heillar mig ekkert sérstaklega.  Mig langar meira að halda áfram að læra að syngja, ætla frekar að stefna á að læra tónfræði og söng og taka stigspróf í því.  En ég klára þessa braut vonandi í vor, en ég fékk mikið metið og er að taka þetta nám á einhverri hraðferð.  

Göngur og réttir voru að venju þetta haust eins og önnur en Sverrir tók enga veltu á hjólinu þetta árið, Valli aftur á móti steyptist ofan í einhvern skurð á því á heimleið úr réttunum.  Við Sverrir fórum á kóranámskeið í Reykholti í nóvember með kirkjukór Hólmavíkurkirkju og áttum þar góða helgi.  Krakkarnir eru öll í tónskólanum, Jakob lærir á harmónikku og trompet, Kristín á þverflautu og Júlíana er á píanó.  Þau standa sig ágætlega, þó stelpurnar séu samviskusamari við æfingar.  Emil og Jennifer fluttu í eigið hús í Kristianssand á aðfangadag, þau eru bæði að vinna hjá sama fyrirtækinu, sem hannar og setur upp lofthreinsibúnað.  Emil er vélaverkfræðingur og Jennifer tækniteiknari. Vonandi getum við heimsótt þau fljótlega, þegar kreppunni líkur, Icesavið greitt og fl.  Andri kláraði grunndeild upplýsinga og fjölmiðlabrautar nú fyrir jólin með góðum einkunnum.  Hann er að flytja til kærustunnar í byrjun janúar en hún á íbúð á Nörrebro í Kaupmannahöfn.  Ane er í læknanámi og á eftir 1-2 ár í kanditatsárið ef ég hef skilið hana rétt, nú þarf maður aldeilis að dusta rykið af barnaskóladönskunni.  Andri ætlar að leita sér að vinnu á leikskóla eða ehv. álíka þegar hann er kominn út.  Kristín datt á svelli laugardaginn fyrir jól og verður í gifsi fram í byrjun febrúar.  Við héldum að hún hefði tognað fyrst þar sem hún var stokkbólgin um ökklan, við sögðum henni bara að harka af sér, það væri nú vont að togna.  Degi síðar bar hún sig frekar aumlega og þá var nú hringt í doktorinn sem myndaði daginn eftir, þar sást að sprunga er neðst í leggnum.

Þar sem árið hefur verið nokkuð gott við okkur í kreppunni fórum við í útrás til Reykjavíkur og versluðum Patroljeppa með aðstoð eins ríkisbankans.  Við erum því ekki lengur eins og síld í tunnu og brunum um bæinn með bros á vör, þangað til við festum okkur, en það er víst hægt að festa sig á jeppa. 
 

Kæru vinir í kvöld verður áramótagleði í Víkurtúni 2, Bassastaðabændur og þeirra afkomendur mæta utan Guðbjargar,Rögnu og þeirra barna.  Pabbi og mamma kíkja þegar farið verður að sprengja.  Við sendum góðar nýársóskir til allra ættingja og vina.

Óver end át....kv. Sal

Ég er að fara í hljóðver á morgun á Flateyri.  Upptökur á hamingjulaginu " Ég vil dansa" fara fram í Tanknum á morgun.  Myndir síðar